الثلاثاء، 18 أغسطس 2015

BACK TO SCHOOl "PART1" essentials must have . . العودة إلى المدارس "الجزء ١" أساسيات ضروريه

.

.

السلام عليكم ورحمه الله وبركاته 






بما انه قرب موعد العوده إلى المدارس 
حبيت أسوي موضوع إن شاء الله يفيد كل بنت تروح للمدرسه أو الجامعه 

موضوعنا اليوم يتكلم عن الاشياء الاساسيه اللي تحتاجها كل بنت
وضروري يكون في شنطتها او اللوكر اللي موجود في المدرسه 


. . . 



حاولت احط كل الاشياء الضروريه اللي يمكن تحتاجه أي بنت 
طبعا قست الأشياء على نفسي
قلت لو انا في المدرسه أو مكان عمل شو هي الاشياء الضروريه اللي لازم تكون عندي

سويت لسته بالاشياء المهمه 
وقسمتها في ثلاث مجموعات لتسهيل عليكم تشوفون الاغراض


/  /  / 



"المجموعه الأولى"

١- مزيل العرق "ديودرنت": هالشي لازم يكون موجود بالنسبه لجونا ضروري يكون موجود
وبعد حصه الرياضه نقدر نستخدمه 
أكيد مافي حد منا يحب تطلع منه ريحه مب مرغوب فيها 
أنا استخدم "دوف أوريجونال" 
هو كريمي وفيه ريحه خفيفه منعشه 

٢- عطر: طبعا العطر يمكن البعض يستغنى عنه  
بس انا احيانا احب استخدمه مثلا بعد الفسحه ماحب ريحه الأكل 
ف كم نقطه بس احط منه تكون الريحه خفيفه
ما أفضل تشلين وياج عطر بحجم كبير 
لانه سبحان الله يمكن يضيع 
ف أقترح تشلين وياج عطر يكون حجمه صغير 
وأحيانا بعض العطور أتي معها سامبلز سايسز الأحسن تستغلينها لملمدرسه

٣- مرطب للشفايف: هالشي لابد منه يكون معاج 
حتى لو في جيب المريول حطيه معاج
لانه الشفايف مع الجو الحار او البارد تنشف وتتشقق 
فالافضل كل شوي تحطين منه
انا احب استخدم مرطب الشفايف من فازلين 
ترطيبه وايد حلو وحجمه مناسب وفيه لون خفيييف يعطي لون مايل على الطبيعي

٤- معقم للأييد: طبعا المعقم مايغطي على وظيفه الماي والصابون 
بس المعقم نستخدمه ك حمايه سريعه 
يعني في حياتنا في المدرسه وايد اشياء نلمسها من الاقلام والكتب
وطبعا مانقدر كل شوي نروح نغسل ايدنا 
فالمعقم حل سريع 

٥- مناديل "كلينكس": المناديل شي اساسي يكون موجود 
لانه مانعرف في اي لحظه يمكن نوسخ نفسنا بالاكل 
او اي شي ثاني 


. . . 



"المجموعه الثانيه" 


١- مناديل مبلله: استخداماتها متعدده 
ومنها نستخدمها بعد الاكل، تكسبنا وقت 
يمكن الحمام يكون بعيد او مزحوم نقدر نستخدمها لحل المشكله

٢- معقم للجروع + لزق للجروح: بالنسبه لي أول يوم دراسي 
تصيرلي مأساه مع جوتي المدرسه
ماعرف إذا في حد مثلي يعاني من هالشي
بس لانه الجوتي يكون يديد لازم تنجرح ريولي مع كثره المشي
ف استخدم المعقم واللزق لجروح أول يوم 
وطبعا في بعض الاحيان تصيرلي في الايام العاديه 

٣- الفوط الصحيه: شي اساسي يكون مع كل بنت
اذا انتي ما احتجتيها غيرج يمكن يحتاجها ^^
طبعا في كثير انواع منها استخدمي اللي يناسبج

٤- البندول: لابد منه لانه الصداع مايدق الباب ويقول انا ياي فالطريج 


. . . 




"المجموعه الثالثه" 


١- مشط: افضل استخدم المشط بعد حصه الرياضه 
طبعا بعد الرياضه الشعر يتطاير ويباله ترتيب

٢- عده الخياطه: سبحانه الله طحتي وانشق المريول 
ف بتحتاجين ع الاقل تعدلين من شكله شوي 
حتى لو ماكنتي محترفه في الخياطه أكيد حد من ربيعاتج تعرف تخيط

٣- اعواد القطن: يمكن تحتاجينها بعد حصه السباحه او تعدلين جحال عيونج 

٤- بنسات + ربطه للشعر: شي ضروري لانه يمكن ربطه شعرج تخترب
او تضيع وقت حصه الرياضه 

٥- مبرد اظافر: لا سمح الله انكسر ظفرج تقدرين تبردينه عشان تنحل المشكله

٦- فرشاه ومعجون: للي حابه تفرش اسنانها بعد الاكل 

٧- قطن: اذا كانت بشرتج دهنيه رح تستفيدين منه

٨- علكه "لبَان": لبعد الاكل 


/ / / 


وبجي أكون خلصت 
ان شاء الله تستفيدون من البوست 
يمكن أكون نسيت اضيف شي، ف اللي حابه تضيف تكتب فالكومنت 
عشان البنات يستفيدون 


كونوا بالقرب 






ليست هناك تعليقات:

إرسال تعليق